27–28 მაისს თბილისში, გლდანის სპორტულ კომპლექსში კიკბოქსინგის საერთაშორისო ტურნირი ჩატარდა. ღონისძიების ორგანიზატორი ტაიბოქსისა და კიკბოქსინგის ეროვნული ფედერაცია იყო, მხარდამჭერები კი – საქართველოს კუდოს ფედერაცია და სპორტული კლუბი „ბლექ თაიგერი“.

ორთაბრძოლები K-1–ის წესებით მიმდინარეობდა. შეჯიბრში საქართველოდან და მეზობელი სახელმწიფოებიდან  200–ზე მეტი სპორტსმენი მონაწილეობდა.  ტურნირზე წარმატებულად იასპარეზეს საქართველოს კუდოს ფედერაციის სპორტსმენებმა. პირველი ადგილი  მარი ნანავამ, კონსტანტინე ჯანგავაძემ, ნიკა ავდოიანმა, საბა მაქაცარიამ და დავით ჯაბახიძემ დაიკავეს. ნოდარ ხარებაშვილმა ერთი შეხვედრა ჩაატარა და გამარჯვება მოიპოვა, ირაკლი ქარდავა კი მეორე ადგილზე გავიდა. აღსანიშნავია, რომ კონსტანტინე ჯანგავაძემ და ნიკა ავდოიანმა პირველ ადგილთან ერთად, საჩემპიონო ქამრებიც მოიპოვეს.

ტურნირის დასკვნით ნაწილში ქართველმა კუდოისტებმა საჩვენებელი გამოსვლა მოაწყვეს და დამსწრე საზოგადოებას კუდოს საბრძოლო ხელოვნების ელემენტები წარმოუდგინეს.
საპრიზო ადგილზე გასულ სპორტსმენებს მედლები და დიპლომები გადაეცათ. აგრეთვე, ტურნირზე გაწეული მხარდაჭერისათვის, ტაიბოქსისა და კიკბოქსინგის ეროვნული ფედერაციისგან საპატიო დიპლომები კუდოს ფედერაციის პრეზიდენტს, დავით ხახუტაშვილსა და ვიცეპრეზიდენტს, ალექსი ფილფანს გადაეცათ.

ყვარლის მუნიციპალიტეტის სოფელ ახალსოფელში, სპორტულ კლუბ „ბლექ თაიგერის“ ორგანიზებითა და საქართველოს კუდოს ფედერაციის მხარდაჭერით, ქართული ჭიდაობის ტურნირი ჩატარდა. შეჯიბრი  სახალხო დღესასწაულ „სამებობა 2017-ის” ფარგლებში გაიმართა და მასში მონაწილეობა საქართველოს სხვადასხვა რაიონის წარმომადგენლებმა მიიღეს.

ვეტერან მოჭიდავეებთან ერთად ღონისძიებას სპორტისა და ახალგაზრდობის საქმეთა მინისტრი ტარიელ ხეჩიკაშვილი, სახელმწიფო დაცვის სპეციალური სამსახურის უფროსი ანზორ ჩუბინიძე, კახეთის მხარეში სახელმწიფო რწმუნებულის, გუბერნატორის პირველი მოადგილე  ირაკლი შიოშვილი და ყვარლის მუნიციპალიტეტის გამგებელი  ილია მზექალაშვილი დაესწრნენ.

შეჯიბრი რვა წონით კატეგორიაში ჩატარდა. ტურნირში  ქართველ მოჭიდავეებთან ერთად უკრაინელმა სუმოისტებმაც იასპარეზეს, რომლებიც საქართველოში  სპეციალურად ამ შეჯიბრისთვის  ჩამოვიდნენ. საპრიზო ადგილზე გასული სპორტსმენები ფულადი პრიზებით დაჯილდოვდნენ.

“სამებობის” დღესასწაულისა და ტურნირის შესახებ, საქართველოს კუდოს ფედერაციის დამფუძნებელმა და პრეზიდენტმა, აღნიშნული შეჯიბრის ორგანიზატორმა და მხარდამჭერმა, დავით ხახუტაშვილმა ისაუბრა:

“ყვარლის მუნიციპალიტეტსა და სრულიად საქართველოს ვულოცავ “სამებობის” დღესასწაულს. ეს არის ტრადიციული დღესასწაული, რომელიც ჩვენთან ყოველწლიურად აღინიშნება. ტურნირის მიზანია, ახალგაზრდა თაობას მივცეთ მოტივაცია, რომ უფრო უკეთესად აღიქვან ამ დღესასწაულის მნიშვნელობა და დააფასონ ტრადიციული ქართული სპორტის სახეობები,” – განაცხადა დავით ხახუტაშვილმა.

სპორტისა და ახალგაზრდობის საქმეთა მინისტრის, ტარიელ ხეჩიკაშვილის განცხადებით, მსგავს დღესასწაულებზე ჩატარებული სპორტული შეჯიბრება ქვეყანაში ჯანსაღი წესის პოპულარიზაციას უწყობს ხელს:

„ქართული ჭიდაობა არის ჩვენი საგანძური, ჩვენს ყველა წარმატებულ სპორტსმენს ეს სკოლა გავლილი აქვს. შესაბამისად, უმნიშვნელოვანესია ქართული ჭიდაობის შენარჩუნება და აღორძინება. მინდა მადლობა გადავუხადო ორგანიზატორებსა და პირადად დავით ხახუტაშვილს, რომელიც არის მაგალითი იმისა, თუ როგორ შეიძლება ადამიანი ერთდროულად ეწეოდეს წარმატებულ ბიზნესსაქმიანობას და ამავდროულად თავის რაიონისთვის ბევრი სასიკეთო საქმე აკეთოს. მიხარია, რომ სპორტი განსაკუთრებულ ადგილს იკავებს მის საქმიანობაში,” – აღნიშნა  ტარიელ ხეჩიკაშვილმა.

“სამებობის” დღესასწაული ახალსოფელში ტრადიციულად აღდგომის მომდევნო სამშაბათს აღინიშნება. ქართული ჭიდაობა დღესასწაულის მთავარი შემადგენელი ნაწილია. 2016 წლიდან “სამებობის” დღესასწაულისადმი მიძღვნილი ღონისძიებების ინიციატორი და მხარდამჭერია საქართველოს კუდოს ფედერაციის პრეზიდენტი დავით ხახუტაშვილი, რომელიც პარალელურად სპორტულ კლუბ “ბლექ თაიგერსაც” ხელმძღვანელობს.

კუდოს ფედერაციის პრეზიდენტმა, დავით ხახუტაშვილმა საქართველოს კუდოს ფედერაციის წარმატებული სპორტსმენები და მწვრთნელები დააჯილდოვა. დაჯილდოების ცერემონია 19 თებერვალს, სპორტულ კლუბ „ფიტნეს 31-ში” გაიმართა.

ღონისძიებას ფედერაციის ხელმძღვანელებთან ერთად მოწვეული სტუმრები დაესწრნენ. მათ შორის შერეული ორთაბრძოლების ტიტულოვანი სპორტსმენი  კარიმ ბარკალაევი. დამსწრე საზოგადოებას ფედერაციის ვიცე–პრეზიდენტმა, ალექსი ფილფანმა მიმართა. მან საქართველოში საბრძოლო ხელოვნება კუდოს განვითარების პერსპექტივებზე ისაუბრა და სპორტსმენებს ფედერაციის სახელით მხარდაჭერა აღუთქვა.

ვეტერანმა სპორტსმენებმა,  ფირუზ მარგიანმა და უშანგი კუზანაშვილმა საქართველოს კუდოს ეროვნული ფედერაციის მუშაობა დადებითად შეაფასეს და დავით ხახუტაშვილს მადლობა გადაუხადეს საქართველოში სპორტის ამ სახეობის განვითარების ხელშეწყობისთვის.

კუდოს ფედერაციის პრეზიდენტმა, დავით ხახუტაშვილმა კუდოისტები, რაულ თუთარაული და ასლან ორუჯევი მსოფლიო თასზე მიღწეული წარმატებისთვის ფულადი პრიზებით დააჯილდოვა. მსოფლიო თასის გამარჯვებულ თუთარაულს 5000 ლარი, ბრინჯაოს მედალოსან ორუჯევს კი  2000 ლარი გადაეცა. თუთარაულს, ორუჯევს   და ნაკრების მესამე წევრს, სოსო ნიჟარაძეს ყოველთვიური ხელფასი, 500 ლარის ოდენობით დაენიშნათ. ერთჯერადი ფულადი პრიზებით დაჯილდოვდნენ ფედერაციის მწვრთნელები, გიორგი კაბულაშვილი, ამირან სახოკია და მამუკა შონია.

სპორტსმენებს, რომლებიც 15–16 თებერვალს, ტაკაში აზუმას სემინარს ესწრებოდნენ მონაწილეობის სერტიფიკატები გადაეცათ.

აღსანიშნავია, რომ საქართველოს კუდოს ფედერაციის ხელმძღვანელობის მიერ სპორტსმენების წახალისების ფაქტი პირველი შემთხვევა არ არის. რუსეთში გამართულ „კუდო ჩელენჯის“ ტურნირზე მიღწეული წარმატებისთვის მიმდინარე წლის 13 იანვარს, ასლან ორუჯევი ფედერაციის პრეზიდენტმა, დავით ხახუტაშვილმა პლაზმური ტელევიზორით დაასაჩუქრა.

რუსეთის კუდოს ფედერაცია ტაკაში აზუმას თბილისში ვიზიტს ეხმაურება და საკუთარ ვებ–გვერდზე ვრცელ სტატიას აქვეყნებს, რომლის თარგმანს უცვლელად გთავაზობთ:

„აზუმა ტაკაშის პირველი სემინარი თბილისში“

ინდოეთში მიმდინარე კუდოს II მსოფლიო თასზე ქართველმა მებრძოლებმა წარმატებით იასპარეზეს და სამი საშეჯიბრო კატეგორიიდან ორში მედალი მოიპოვეს. რაულ თუთარაული ჩემპიონი გახდა, ასლან ორუჯევმა კი მესამე ადგილი დაიკავა.

თუთარაულმა პირველ შეხვედრაში მონღოლი მოწინააღმდეგედაამარცხა. შემდეგ კი იაპონიისა და რუსეთის წარმომადგენლებსაც აჯობა  და მსოფლიო თასის მფლობელი გახდა.

ასლან ორუჯევმა შრი-ლანკელ მეტოქესთან სუფთა გამარჯვება (იპონი) მოიპოვა, უკრაინელი მოწინააღმდეგეც დაამარცხა და ნახევარფინალში გავიდა, თუმცა რუსეთის წარმომადგენელ იგორ პერმინთან შეხვედრა წააგო და მესამე ადგილი დაიკავა, პერმინი კი ჩემპიონი გახდა.

მსოფლიო თასზე იასპარეზა საქართველოს კუდოს ფედერაციის კიდევ ერთმა სპორტსმენმა, სოსო ნიჟარაძემ. პირველ შეხვედრაში მან ბრიტანელი მოწინააღმდეგე დაამარცხა, შემდეგი ორთაბრძოლა კი იაპონელთან წააგო.

კუდოს II მსოფლიო თასი ინდოეთის ქალაქ მუმბაიში დღეს დასრულდა. ქართულ დელეგაციასთან ერთად ტურნირზე იმყოფებოდა ეროვნული ფედერაციის პრეზიდენტი  დავით ხახუტაშვილი. შეჯიბრს აგრეთვე ესწრებოდა საბრძოლო ხელოვნება კუდოს დამფუძნებელი და საერთაშორისო ფედერაციის პრეზიდენტი –ტაკაში აზუმა, რომელმაც გამარჯვებული სპორტსმენები დააჯილდოვა. ქართველი კუდოისტები სამშობლოში 13 თებერვალს დაბრუნდებიან.